📌 Aliambia Jukwaa la IRENA UAE kuwa Tanzania imejipanga vema kwa ujio huo.
📌 Asema Tanzania imerekehisha sheria ya uwekezaji kuruhusu sekta binafsi kutekeleza miradi
📌 Nchi wanachama IRENA wataka wabia wa maendeleo kuwekeza kwenye miradi ya nishati ambayo ni rafiki kwa mazingira
Abu Dhabi, UAE
Naibu Katibu Mkuu Wizara ya Nishati anayeshughulikia umeme na nishati jadidifu Dkt Khatibu Kazungu amesema ,Tanzania imejipanga vema kupokea ugeni wa Wakuu wa Nchi 53 wa Afrika watakaohudhuria mkutao wa wakuu wa nchi wa masuala ya nishati unaotarajiwa kufanyika tarehe 27 hadi 28 Januari, 2025 jijini Dar es Salaam.
Dkt Kazungu ameyasema hayo kwenye mkutano wa Baraza la 15 la wakala wa kimataifa wa nishati jadidifu (IRENA) wakati akiwasilisha mada kwenye mjadala wa ngazi ya juu wa Mawaziri wenye lengo la kujadili namna ambavyo nchi wanachama wanaweza kutumia fursa ya ushawishi kwa wadau wa maendeleo kutenga fedha kwa ajili ya miradi ya nishati jadidifu ambayo ni rafiki kwa mazingira.
‘’ Nipende kuwajulisha kuwa Tanzania ni mwenyeji wa mkutano huo wa masuala ya nishati na ajenda hii kama nchi tumeibeba kwa vitendo kuhakikisha waafrika Milioni 300 kusini mwa jangwa la Sahara wanapata umeme ifikapo mwaka 2030 na natoa rai kwa nchi wanachama wa IRENA kuibeba ajenda hii kwa vitendo.‘’ Amesema Dkt. Kazungu
Amesema mkutano wa M300 utaangazia pia mageuzi kwenye sekta ya nishati na kuangalia uwezekano wa upatikanaji wa fedha kwa ajili ya utekelezaji wa miradi ya kuunganisha wateja sambamba na ushirikishwaji wa sekta binafsi kwenye utekelezaji wa miradi ya pamoja na kuhamasisha matumizi ya nishati safi ya kupikia
Aidha Dkt. Kazungu amewaambia wajumbe wa IRENA kuwa kauli mbiu itakayoongoza mkutano huo ni kuharakisha upatikanaji wa nishati Afrika ili kuwatoa gizani waafrika wapatao milioni 685 kati ya Bilioni 1 ambao hawana nishati ya umeme.
Dkt Kazungu amesisitiza kuwa Serikali imefanya marekebisho ya sheria ya uwekezaji ili kutoa fursa kwa sekta binafsi kushirikiana na Serikali kutekeleza miradi ya nishati jadidifu kutokana na umuhimu wake
Amesema Tanzania inawashukuru sana wabia wa maendeleo kwenye utekelezaji wa miradi ya nishati jadidifu kama vile Benki ya Dunia, Benki ya maendeleo ya Afrika AfDB, AFD, KFW kwa kufadhili miradi mbalimbali ya nishati jadidifu nchini ikiwemo ule wa Kakono na Malagarasi ambayo iko kwenye hatua za utekelezaji.
Kwa upande Makamu wa Rais anayeshughulikia masuala ya Nishati na Mabadiliko ya Tabia Nchi kutoka Benki ya AfDB, ambao pia wanafadhili miradi ya nishati jadidiifu kwa upande wa Afrika Kevin Kariuki alisema kuwa utashi wa kisiasa, uainishaji wa sera za wazi vinahitajika sana kwenye utekelezaji wa miradi ya umeme kwa nchi za Afrika ili iweze kuleta tija kwa wananchi wake
Alisema ni wakati sasa kwa nchi za Afrika kuchangamkia fursa za utekelezaji wa miradi ya nishati ambayo ni rafiki kwa mazingira ili kukabiliana na mabadiliko ya tabianchi na kupunguza hewa ya ukaa na kuzitaka jumuiya za kimataifa kuunga mkono azimio hilo kwa vitendo.
