Na Mwandishi Wetu, JamhuriMedia, Zanzibar

RAIS wa Serikali ya Mapinduzi Zanzibar na Mwenyekiti wa Baraza la Mapinduzi, Dkt. Hussein Mwinyi, ameipongeza Benki ya CRDB kwa mchango wake katika kutoa mikopo ya nyumba, huku akisisitiza juhudi zaidi zichukuliwe ili kuwawezesha watu wengi kumudu makazi bora.

Rais Mwinyi ameyasema hayo wakati akifungua Mkutano wa 40 wa Umoja wa Afrika wa Fedha za Makazi (AUHF) na Mkutano Mkuu wa Mwaka (AGM) uliofanyika kuanzia Oktoba 14 hadi Oktoba 18, 2024, katika Hoteli ya Melia ambapo Benki ya CRDB imejiunga tena na umoja huo wa bara.

“Kufikia Juni 2024, nimeambiwa kuwa, idadi ya benki za biashara na taasisi za kifedha zinazotoa mikopo ya nyumba zilikuwa 31, na zilitolewa jumla ya Sh. Bilioni 625, sawa na Dola za Marekani milioni 234.3 kama deni la nyumba kwa makazi ya watu.

Rais wa Zanzibar, Dkt. Hussein Mwinyi (kulia) akiandika jambo kabla hajafungua mkutano wa 40 wa Shirikisho la Kampuni za Mikopo ya Nyumba Afrika (AUHF) ulioandaliwa kwa ushirikiano na Shirikisho la Kimataifa la Masoko ya Mikopo ya Nyumba
(ISMMA). Wa pili kushoto ni Afisa Mtendaji Mkuu wa Kampuni ya Mikopo ya Nyumba Tanzania (TMRC), Oscar Mgaya na wa kwanza kushoto ni Afisa Mtendaji Mkuu wa Kampuni ya Mikopo ya Nyumba Nigeria (NMRC), Kehinde Ogundimu. Benki ya CRDB ni mshiriki na mdhamini wa mkutano huo.

“Ingawa hii inaonesha hatua kubwa tuliyopiga, lakini juhudi zaidi zinahitajika ili kuhakikisha kila mtu anapata fursa ya mkopo wa nyumba kwani hii ni njia ya uhakika ya kumiliki nyumba bora na kuishi kwa heshima,” amesema Rais Mwinyi.

Amesema kuwa Benki ya CRDB inaongoza kwa kutoa mikopo ya nyumba kwa asilimia 34.4 ambapo ni mfano mzuri kwa washindani wake, ambao wanapaswa kuja na mikakati bora zaidi ili kuwafikia wateja wengi na hivyo kuchangia zaidi katika sekta ya mikopo ya nyumba na uchumi kwa ujumla.

Wakati huo huo, Rais aliomba benki za biashara na taasisi za kifedha kutoa ushauri bora juu ya jinsi ya kukabiliana na changamoto zinazowafanya watu wachache pekee waweze kumudu mikopo ya nyumba nchini.

Licha ya kuwa na watoa mikopo wengi nchini, Rais Mwinyi amesema Watanzania wengi hawawezi kumudu mikopo ya nyumba, na hivyo inawachukua muda mrefu kumaliza ujenzi wa nyumba zao, jambo ambalo ni gharama kubwa zaidi.

“Ninyi ni wataalam wa sekta hii. Milango ya serikali iko wazi kupokea maoni yenu kuhusu jinsi ya kukabiliana na changamoto hizi. Tafadhali shirikianeni nasi ili tuwawezeshe Watanzania wengi zaidi kumudu mikopo ya nyumba,” amehimiza Rais Mwinyi.

Akizungumzia mchango wa Benki ya CRDB, Bonaventura Paul amesema kuwa kufikia Juni 2024, walikuwa wametoa jumla ya Sh. Bilioni 208.34 na kunufaisha wateja 1,628, huku akibainisha kuwa wana uwezo wa kutoa zaidi, na hivyo kuwakaribisha wateja zaidi kutumia fursa hiyo ya kujenga na kumiliki nyumba bora.

“Kwenye Benki ya CRDB tunatoa mikopo ya nyumba kwa makazi ya biashara na makazi binafsi. Tuna ukwasi wa kutosha kukidhi mahitaji na matarajio ya wateja wetu. Tunamkaribisha yeyote mwenye nia na uwezo wa kuchukua mikopo hiyo,” amesema Bonaventura.

Amesisitiza umuhimu wa kuongeza rasilimali kwani taasisi za kifedha zilizopo zina uwezo wa kutoa mikopo ya nyumba kwa vitengo 200,000 kwa mwaka, na hivyo kuacha pengo la vitengo milioni 3 ambalo limekuwepo kwa muda mrefu bila kutatuliwa. Alisema kuwa kama hakuna ubunifu utakaofanywa, nchi itaendelea kuwa na pengo hilo kwa miaka mingi ijayo, hali ambayo itaathiri hata vizazi vijavyo.

Utafiti unaonesha kuwa ni asilimia 3 tu ya Watanzania wanaomiliki hati miliki, hivyo kukidhi moja ya vigezo vya kupata mkopo wa nyumba, hali inayoacha idadi kubwa ya watu wasiofuzu ambao wanalazimika kujenga nyumba kwa kutumia njia mbadala ambazo ni ghali zaidi.

Rais wa Zanzibar, Dkt. Hussein Mwinyi akifungua mkutano wa 40 wa Shirikisho la Kampuni za Mikopo ya Nyumba Afrika (AUHF) ulioandaliwa kwa ushirikiano na Shirikisho la Kimataifa la Masoko ya Mikopo ya Nyumba
(ISMMA). Benki ya CRDB ni mshiriki na mdhamini wa mkutano huo.

Benki ya CRDB mwaka huu imejiunga tena na Umoja wa Afrika wa Fedha za Makazi (AUHF), shirika linalowakutanisha benki za mikopo ya nyumba, jamii za ujenzi, mashirika ya nyumba, na mashirika mengine ya kifedha kutoka nchi 17 za bara la Afrika, kwa lengo la kukusanya fedha kwa ajili ya makazi nafuu na ya bei rahisi kote barani Afrika.

Katika mkutano wa mwaka huu, ambao AUHF imeungana na Chama cha Soko la Mikopo ya Nyumba ya Pili Kimataifa (ISMMA), unalenga kuimarisha maendeleo ya soko, kuboresha ufanisi, na kushughulikia changamoto katika masoko ya nyumba barani ambapo uhaba wa nyumba ni changamoto kubwa kwa nchi nyingi.

Post Views: 152