Huku vita vya Urusi na Ukraine vikiingia awamu mpya ya mashambulizi makubwa ya ndege zisizo na rubani, kila upande umeendesha mashambulizi makubwa zaidi tangu kuanza kwa mzozo huo.
Wizara ya Ulinzi ya Urusi imesema ilifanikiwa kudhibiti ndege 84 za Ukraine zisizo na rubani zilizokuwa zikirushwa katika mikoa sita, huku baadhi zikikaribia Moscow, hali iliyosababisha safari za ndege kuhamishwa kutoka viwanja vitatu vikuu vya jiji hilo.
Kwa upande wake, Jeshi la Anga la Ukraine liliripoti kwamba Urusi ilirusha ndege 145 zisizo na rubani kuelekea kila kona ya nchi hiyo usiku wa Jumamosi, ingawa nyingi zilidunguliwa.
Hii ilikuwa ni jaribio la Ukraine kushambulia Moscow kwa kiwango kikubwa zaidi tangu vita kuanza, jambo ambalo limeibua hofu ya kuzidi kwa uhasama.
Katika eneo la Ramenskoye, kusini-magharibi mwa Moscow, watu watano walijeruhiwa na nyumba nne ziliharibika kutokana na vifusi vilivyoanguka baada ya ndege zisizo na rubani kuangushwa. Maeneo ya Ramenskoye, Kolomna, na Domodedovo yalihusika zaidi na mashambulizi hayo, huku maafisa wakiripoti kuangushwa kwa ndege zisizo na rubani 34 katika mji wa Moscow.
Vurugu hizi zinajiri wakati ambapo kuna matarajio kwamba Rais mteule wa Marekani, Donald Trump, huenda akatoa shinikizo kwa pande zote mbili kufikia suluhu ya mzozo huo. Mwezi Mei mwaka jana, ndege zisizo na rubani mbili ziliangushwa karibu na Kremlin, na kumekuwa na mashambulizi kadhaa ya aina hii katika eneo la biashara la Moscow, likiwemo shambulio lililoua mwanamke mmoja huko Ramenskoye mnamo Septemba.
Mashambulizi haya ya hivi karibuni yanaashiria kuongezeka kwa ghasia katika mzozo huu unaoendelea kwa muda mrefu, na hakuna dalili za kupungua kwa mapigano.
