Na Mwandishi Wetu, JamhuriMedia, Dar es Salaam
JUKWAA linaloongoza katika huduma za usafiri wa mtandaoni, linathibitisha rasmi kwamba punguzo linalotolewa kwa abiria linagharamiwa kikamilifu na Bolt.
Taarifa hiyo inakuja wakati ambapo kuna dhana potofu kuhusu punguzo la safari zinazotolewa kwa abiria. Wengi wanadhani kuwa punguzo hizi zinaathiri mapato ya madereva, lakini kampuni inafafanua kuwa hali ni kinyume na mawazo hayo.
“Abiria anapopata punguzo kwenye nauli, Bolt hulipa dereva mara moja kwa kiasi kilichopunguzwa. Malipo haya huonyeshwa papo hapo kwenye mapato ya dereva, kuhakikisha kuwa hakuna hasara yoyote ya kifedha inayopatikana.
” Tumebuni mfumo huu kwa uwazi ili madereva waweze kufuatilia mapato yao kwa urahisi kupitia programu ya Bolt kwa madereva,” alisema Dimmy Kanyankole, Meneja Mkuu wa Bolt Kenya na Tanzania.
“Licha ya hatua hizi, bado kuna madai yanayoendelea kuwa punguzo la Bolt linapunguza mapato ya madereva. Hata hivyo, ukweli ni kwamba madereva hupokea nauli kamili kabla ya Bolt kukata kiwango chake cha kawaida cha kamisheni. Kwa bahati mbaya, upotoshaji huu umeleta mvutano usio wa lazima kati ya madereva na abiria, na mara nyingine kusababisha migogoro wakati wa safari,” aliongeza Kanyankole.
Ili kuboresha uelewa, Bolt imeimarisha mawasiliano yake na madereva na abiria. Kampuni inatoa taarifa za mara kwa mara kwa madereva kupitia arifa ndani ya programu, hutoa muhtasari wa mapato kwa undani ndani ya programu, na kusambaza nyenzo za elimu kupitia SMS, barua pepe, na arifa za programu.
Abiria wanahimizwa kulipa nauli inayoonyeshwa kwenye programu ya Bolt, bila haja ya kujadiliana au kulipa kiasi zaidi ya kinachoonyeshwa. Abiria wanaokumbwa na shinikizo kutoka kwa madereva kuhusu malalamiko ya punguzo wanahimizwa kuripoti matukio hayo kupitia programu ya Bolt. Ripoti hizi zinasaidia Bolt kuchukua hatua stahiki, ikiwemo kutoa mafunzo ya ziada kwa madereva au, kwa visa vya ukiukwaji wa mara kwa mara, kusimamisha akaunti zao.
Kamisheni ya safari zilizo na punguzo huhesabiwa kwa kuzingatia gharama kamili ya safari kabla ya punguzo kutolewa, kuhakikisha kuwa madereva hawapotezi kipato chochote. Pia, malipo yote ya punguzo hufanyika papo hapo na yanaonekana katika mapato ya kila siku ya dereva, kuhakikisha uwazi na ufafanuzi wa mapato ndani ya programu ya Bolt.
Bolt inaendelea kujitolea kusaidia ustawi wa kifedha wa madereva, kutoa nauli za haki na nafuu kwa abiria, na kuimarisha uaminifu kati ya madereva na abiria kupitia mawasiliano na elimu bora. Kwa kusisitiza ukweli huu, Bolt inaendelea kuunda mfumo wa usafiri wa mtandaoni unaoaminika na wa haki, ambapo madereva na abiria wote wananufaika kwa huduma bora na isiyo na usumbufu.
–
