Waziri Mkuu wa Israel, Benjamin Netanyahu, ametishia kujitoa kwenye makubaliano ya kusitisha mapigano katika ukanda wa Gaza, akisema majeshi ya Israel yataanza tena mashambulizi dhidi ya Hamas ikiwa hawatarudisha mateka wa Israel kabla ya Jumamosi.
Netanyahu alieleza kuwa, ikiwa Hamas haitawarudisha mateka wao, Israel itasitisha makubaliano ya kusitisha mapigano na vikosi vya ulinzi vya Israel vitarejea kwenye mapigano makali hadi Hamas itakaposhindwa kabisa.
Hamas imeeleza kuwa inaweza kuchelewesha kurudisha mateka watatu wa Israel, ikishutumu Israel kwa kushindwa kutimiza masharti ya makubaliano ya kusitisha mapigano.
Tangu kuanza kwa makubaliano hayo, Hamas imewaachilia mateka 21, huku Israel ikiwaachilia huru wafungwa 730 wa Kipalestina. Awamu ya pili ya makubaliano inahitaji kuwaachilia mateka wote waliosalia na kuwa na makubaliano ya kudumu ya kusitisha mapigano.
