Na Isri Mohamed
Timu ya Taifa ya Tanzania (Taifa Stars) leo Novemba 19, 2024 itashuka dimbani Benjamin Mkapa kwenye mchezo wa mwisho wa kuwania kufuzu kombe la Mataifa Afrika AFCON 2025 dhidi ya Guinea utakaopigwa saa kumi jioni.
Stars ambayo ipo nafasi ya tatu kwenye msimamo wa Kundi H ikiwa na pointi 7 baada ya mechi 5 inahitaji ushindi tu ili kufuzu mashindano ya AFCON 2025 yatakayofanyika Nchini Morocco.
Guinea waliopo nafasi ya pili pointi 9 baada ya mechi 5 wanahitaji ushindi au sare ili wafuzu huku wakiwa na kumbukumbu ya kupoteza 2-1 dhidi ya Stars kwenye mchezo wa raundi ya kwanza.
Katika kundi H, timu ya taifa ya Congo ndiyo inayoshika usukani ikiwa na alama 12, huku Ethiopia wakishika mkia wakiwa na alama moja pekee.
