Yapongeza jitihada za Serikali kupitia Wizara ya Maji
Na Mwandishi Wetu, JamhuriMedia, Mwanza
Kamati ya Kudumu ya Bunge ya Bajeti imeridhishwa na hatua iliyofikiwa ya utekelezaji wa mradi wa Maji uliojengwa eneo la Butimba Wilayani Nyamagana mkoani Mwanza unaozalisha kiasi cha lita milioni 48 kwa siku.
Hayo yamedhihirishwa Januari 8, 2024 na Mwenyekiti wa Kamati hiyo, Daniel Sillo (Mb) wakati wa ziara ya kukagua hatua ya utekelezwaji wa mradi huo.
“Kamati imeridhishwa na mradi huu wa maji na tunatoa pongezi kwa Rais wetu Dkt. Samia Suluhu Hassan kwa dhamira yake ya dhati ya kumtua mama ndoo ya maji kichwani, tumejionea namna mradi huu ulivyotekelezwa umezingatia viwango vyote vya ubora,” amesema.
Sillo amesisitiza kuwa Kamati haitokuwa kikwazo katika upatikanaji wa fedha ili miradi mingi itekelezwe na ikamilike kwa ubora na kwa wakati hasa ikizingatiwa kuwa jukumu lake la msingi ni kutenga fedha kwa ajili ya ujenzi wa miradi
Katika ziara hiyo, Kamati imeielekeza Wizara ya Maji kuhakikisha inaendelea kusimamia kwa karibu ujenzi wa miradi ya maji kote nchini ili dhamira ya Rasi. Dkt. Samia Suluhu Hassan itimie kikamilifu.
“Tunaipongeza Wizara ya Maji, chini ya usimamizi wa Waziri wake Mhe. Jumaa Aweso (Mb) kwa kuwa msitari wa mbele kuhakikisha dhamira ya kumtua mama ndoo ya maji kichwani inatimia; Rai yetu ni kwamba Wizara ihakikishe hairudi nyuma na inapeleka miradi kwenye maeneo yote yenye changamoto,” ameelekeza Sillo.
Kwa upande wake Waziri wa Maji, Jumaa Aweso (Mb) alipokea maelekezo ya Kamati na ameihakikishia kuwa Wizara haitorudi nyuma kuhakikisha dhamira ya kumtua mama ndoo ya maji kichwani inatimia
“Sisi kama Wizara hatutokuwa kikwazo kwa Watanzania kupata majisafi, salama na yenye kutosheleza, tutapambana muda wote kuhakikisha miradi inajengwa kwa ubora unaotakiwa na inakamilika kwa wakati ili wananchi wapate huduma,” amesisitiza Aweso
Mhe. Aweso amemshukuru Rais wa Jamhuri ya Muungano wa Tanzania Dkt. Samia Suluhu Hassan kwa kutoa fedha za ujenzi wa mradi huo mkubwa wa maji Jijini Mwanza ambao amesema umeanza kunufaisha baadhi ya maeneo na hivyo kupunguza adha ya maji iliyokuwepo katika baadhi ya maeneo.
Amebainisha kuwa uelekeo wa Serikali kupitia Wizara ya Maji ni kujenga miradi ya maji ya kimkakati kwa kutumia vyanzo vya maji toshelevu hususan katika maeneo yenye changamoto ya upatikanaji wa huduma ya maji ili kufikisha asilimia 95 ya upatikanaji wa huduma ya maji kwa maeneo ya mijini na aslimia 85 kwa maeneo ya vijijini ifikapo mwaka 2025.
“Tunamshukuru sana Rais wetu, Dkt. Samia Suluhu Hassan ametupatia fedha na tumefanikiwa kutekeleza mradi huu mkubwa ambao tayari tumeanza kushuhudia matunda yake katika baadhi ya maeneo hasa ikizingatiwa kuwa changamoto ya maji kwa Jiji la Mwanza hapo awali ilikuwa ni kubwa,” amesema Waziri Aweso.
Waziri Aweso ameielekeza Mamlaka ya Majisafi na Usafi wa Mazingira Mwanza (MWAUWASA) kuhakikisha wananchi wengi zaidi wanaunganishwa na huduma ya maji na kusiwe na sababu zisizo za lazima katika kutimiza zoezi hilo.
Aidha, ametoa pongezi kwa Wabunge wa Nyamagana na Ilemela, uongozi wa Mkoa wa Mwanza na Wilaya zake na Bodi ya Wakurugenzi MWAUWASA kwa usimamizi na ufuatiliaji mzuri na wa karibu wa mradi.
